4. Addasā kho upako ājīvako1- bhagavantaṃ antarā ca gayaṃ antarā ca bodhiṃ aṅānamaggapaṭipannaṃ. Disvāna bhagavantaṃ etadavoca: "vippasannāni kho te āvuso indriyāni. Parisuddho chavivaṇṇo pariyodāno. Kaṃ si tvaṃ āvuso uddissa pabbajito? Ko vā te satthā? Kassa vā tvaṃ dhammaṃ rocesī?"Ti. Evaṃ vutte bhagavā upakaṃ ājīvakaṃ gāthāhi ajjhabhāsi: -

"Sabbābhibhu sabbavidu'hamasmi
Sabbesu dhammesu anūpalitto,
Sabbañjaho taṇhakkhaye vimutto
Sayaṃ abhiññāya kamuddiseyyaṃ.

Na me ācariyo atthi sadiso me na vijjati,
Sadevakasmiṃ lokasmiṃ natthi me paṭipuggalo.

Ahaṃ hi arahā loke ahaṃ satthā anuttaro,
Eko'mhi sammāsambuddho sītibhutosmi nibbuto.

Dhammacakkaṃ pavattetuṃ gacchāmi kāsinaṃ puraṃ,
Andhabhūtasmiṃ lokasmiṃ āhañchaṃ2- amatadundubhi"nti.

Yathā kho tvaṃ āvuso paṭijānāsi, arahasi anantajinoti.

"Mā disā ve jinā honti ye pattā āsavakkhayaṃ,
Jitā me pāpakā dhammā tasmā'haṃ upakā jino"ti.

5. Evaṃ vutte upako ājīvako "huveyyapāvuso"ti3vatvā sīsaṃ okampetvā ummaggaṃ gahetvā pakkāmi.

6. Atha kho bhagavā anupubbena cārikaṃ caramāno yena bārāṇasī isipatanaṃ migadāyo, yena pañcavaggiyā bhikkhū, tenupasaṅkami. Addasaṃsu. Kho pañcavaggiyā bhikkhū bhagavantaṃ durato'va āgacchantaṃ. Disvāna aññamaññaṃ saṇṭhapesuṃ: "ayaṃ āvuso samaṇo gotamo āgacchati bāhuliko [PTS Page 009] [q 9/] padhānavibbhanto āvatto bāhullāya. So neva abhivādetabbo. Na paccuṭhātabbo. Tassa pattacīvaraṃ paṭiggahetabbaṃ api ca kho āsanaṃ ṭhapetabbaṃ, sace ākaṅkhissati, nisīdissatī"ti.

1. "Ājiviko ma. Nu. Pu;a. Ma vi; 2. "Āhañachiṃ āhañachuṃ ityapi
3. "Huveyyāvuso' - katthavi