Sādhāraṇapaññatti asādhāraṇa paññatti: sādhāraṇapaññatti.

Ekato paññatti ubhato paññattīti: ubhato paññatti.

Pañcannaṃ pātimokkhuddesānaṃ katthogadhaṃ, kattha pariyāpannanti: nidānogadhaṃ nidānapariyāpannaṃ.

Katamena uddesena uddesaṃ āgacchatīti: dutiyena uddesena uddesaṃ āgacchati.

Catunnaṃ vipattīnaṃ katamā vipattīti: sīlavipatti.

Sattannaṃ āpattikkhandhānaṃ katamo āpattikkhandhoti: pārājikāpattikkhandho.

Channaṃ āpattisamuṭṭhānānaṃ katīhi samuṭṭhānehi samuṭṭhātīti: ekena samuṭṭhānena samuṭṭhāti, kāyato ca cittato ca samuṭṭhāti, na vācato.

Catunnaṃ adhikaraṇānaṃ katamaṃ adhikaraṇanti: āpattādhikaraṇaṃ

Sattannaṃ samathānaṃ katīhi samathehi sammatīti dvīhi samathehi sammati: sammukhāvinayena ca paṭiññātakaraṇena ca.

Ko tattha vinayo ko tattha abhivinayoti: paññatti vinayo, vibhatti abhiviniyo.

Kiṃ tattha pātimokkhaṃ kiṃ tattha adhipātimokkhanti: paññatti pātimokkhaṃ, vibhatti adhipātimokkhaṃ

Kā vipattīti: asaṃvaro vipatti.

Kā sampattīti: saṃvaro sampatti.

Kā paṭipattīti: na evarūpaṃ karissāmiti yāvajīvaṃ āpāṇakoṭikaṃ samādāya sikkhati sikkhāpadesu.

Kati atthavase paṭicca bhagavatā paṭhamaṃ pārājikaṃ paññattanti: dasa atthavase paṭicca bhagavatā paṭhamaṃ pārājikaṃ paññattaṃ: saṅghasuṭṭhutāya, saṅghaphāsutāya, dummaṅkunaṃ puggalānaṃ niggahāya, pesalānaṃ bhikkhūnaṃ phāsuvihārāya, diṭṭhadhammikānaṃ āsavānaṃ saṃvarāya, samparāyikānaṃ āsavānaṃ paṭighātāya, appasannānaṃ pasādāya, pasannānaṃ bhiyyobhāvāya, saddhammaṭṭhitiyā, vinayānuggahāya.

Ke sikkhantīti: sekhā 1- ca puthujjanakalyāṇakā ca sikkhanti.

Ke sikkhitasikkhāti arahanto sikkhitasikkhā.

Kattha ṭhitanti: sikkhā kāmesu ṭhitaṃ

Ke dhārentīti yesaṃ vattati te dhārenti.

Kassa vacananti: bhagavato vacanaṃ arahato sammāsambuddhassa.

1. Sekkhā - machasaṃ