Home
Previous
Text to find
Next
Pali Canon: sutta pitaka , khuddaka nikaya 1 , book: Suttanipata , database record: 8040 .
[BJT Page 42] [x 42/]
136. Na jaccā vasalo hoti na jaccā hoti brāhmaṇo,
Kammanā vasalo hoti kammanā hoti brāhmaṇo.

137. Tadamināpi jānātha yathā medaṃ nidassanaṃ,
Caṇḍālaputto sopāko mātaṅgo iti vissuto.

138. So [PTS Page 024] [q 24/] yasaṃ paramaṃ patto mataṅgo yaṃ sudullabhaṃ,
Āgañchuṃ tassupaṭṭhānaṃ khattiyā brāhmaṇā bahū.

139. So devayānamāruyha virajaṃ so vahāpathaṃ,
Kāmarāgaṃ virājetvā brahmalokūpago ahū.

140. Na naṃ jāti nivāresi brahmalokūpapattiyā,
Ajjhāyakakule jātā brāhmaṇā mattabandhuno.

141. Te va pāpesu kammesu abhiṇhamupadissare,
Aṭṭheva dhamme gārayhā samparāye ca duggatiṃ,
Na te jāti nivāreti duggaccā garahāya vā.

142. Na jaccā vasalo hoti na jaccā hoti brāhmaṇo,
Kammanā vasalo hoti kammanā hoti brāhmaṇo.

Evaṃ vutte aggīkabhāradvājo brāhmaṇo bhagavantaṃ etadavoca:

Abhikkantaṃ bho gotama abhīkkantaṃ bho gotama seyyathāpi bho gotama nikkujjitaṃ vā ukkujjeyya paṭicchannaṃ vā vivareyya mūḷhassa vā maggaṃ ācikkheyya andhakāre vā telapajjātaṃ dhāreyya cakkhumanto rūpāni dakkhintīti, evamevaṃ bhotā gotamena anekapariyāyena dhammo pakāsito. Esāhaṃ bhavantaṃ [PTS Page 025] [q 25/] gotamaṃ saraṇaṃ gacchāmi dhammañca bhikkhusaṅghañca. Upāsakaṃ maṃ bhavaṃ gotamā dharetu ajjatagge pāṇupetaṃ saraṇaṃ gatanti.

Vasalasuttaṃ niṭṭhitaṃ.