126. Yo atthaṃ pucchito santo anatthamanusāsati,
Paṭicchannena manteti taṃ jaññā vasalo iti.

127. Yo katvā pāpakaṃ kammaṃ mā maṃ jaññāti icchati,
Yo paṭicchannakammanto taṃ jaññā vasalo iti.

128. Yo ve parakulaṃ gantvā bhutvāna sucibhojanaṃ,
Āgataṃ na paṭipūjeti taṃ jaññā vasalo iti.

129. Yo brāhmaṇaṃ vā samaṇaṃ vā bhattakāle upaṭṭhite,
Musāvādena vañceti taṃ jaññā vasalo iti.

130. Yo [PTS Page 023] [q 23/] brāhmaṇaṃ vā samaṇaṃ vā bhattakāle upaṭṭhite,
Roseti vācā na ca deti taṃ jaññā vasalo iti.

131. Asataṃ yodha pabrūti mohena paḷiguṇṭhito,
Kiñcikkhaṃ nijigiṃsāno taṃ jaññā vasalo iti.

132. Yo cattānaṃ samukkaṃse parañca mavajānati,
Nihīno sena mānena taṃ jaññā vasalo iti.

133. Rosako kadariyo ca pāpiccho vaccharī saṭho,
Ahiriko anottāpī taṃ jaññā vasalo iti.

134. Yo buddhaṃ paribhāsati atha vā tassa sāvakaṃ,
Paribbājaṃ gahaṭṭhaṃ vā taṃ jaññā vasalo iti.

135. Yo ce anarahā santo arahaṃ paṭijānati,
Coro sabrahmake loke esa kho vasalādhamo,
Ete kho vasalā vutthā mayā co ye pakāsitā.