Home
Previous
Text to find
Next
Pali Canon: sutta pitaka , Samyutta nikaya , book: 1 , database record: 4221 .
[BJT Page 386. [x 386/] ]
Anuṭṭhahaṃ avāyamaṃ1 sukhaṃ yatrādhigacchati,
Suvīra tattha gacchāhi mañca tattheva pāpayāti.

(Suvīro:)
Alasassa2 anuṭṭhātā na ca kiccāni kāraye,
Sabbakāmasamiddhassa tamme sakka varaṃ disāti3

(Sakko:)
Yatthālaso anuṭṭhātā accantaṃ4 sukhamedhati,
Suvīra tattha gacchāhi mañca tattheva pāpayāti.

(Suvīro:)
Akammunā5 devaseṭṭha sakka vindemu yaṃ sukhaṃ,
Asokaṃ anupāyāsaṃ tamme sakka varaṃ disāti,
(Sakko:)
Sace atthi akammena koci kvaci na jīvati,
Nibbāṇassa hi so maggo suvīra tattha gacchāhi mañca tattheva pāpayāti.

So hi nāma bhikkhave, sakko devānamindo sakaṃ puññaphalaṃ upajīvamāno devānaṃ tāvatiṃsānaṃ issariyādhipaccaṃ rajjaṃ kārento6 uṭṭhānaviriyassa vaṇṇavādī bhavissati. Idha kho taṃ bhikkhave sobhetha, yaṃ tumhe evaṃ svākkhāte dhammavinaye pabbajitā samānā uṭṭhaheyyātha ghaṭeyyātha vāyameyyātha appattassa pattiyā anadigatassa adhigamāya asacchikatassa sacchikiriyāyāti.

11. 1. 2.
Susīmasuttaṃ.

248. Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā
Bhikkhū āmantesi bhikkhavoti, bhadanteti te bhikkhū bhagavato paccassosuṃ. Bhagavā etadavoca:

Bhūtapubbaṃ bhikkhave asurā deve abhiyaṃsu. Atha kho bhikkhave sakko devānamindo susīmaṃ7 devaputtaṃ āmantesi: ete tāta susīma, asurā deve abhiyanti. Gaccha tāta susīma, asure paccuyyāhīti. Evaṃ bhaddantavāti kho bhikkhave susīmo devaputto sakkassa devānamindassa paṭissutvā pamādaṃ āpādesi.

1. Avāyāmaṃ-katthaci. 2. Alasvassa-machasaṃ, alasvāyaṃ-syā 3. Disanti-[pts 4.] Accantasukhamedhati-syā 5. Akammanā- [pts 6] karonto-[pts 7.] Susīmaṃ-syā.