Home
Previous
Text to find
Next
Pali Canon: sutta pitaka , digha nikaya , book: 2 , database record: 2426 .
[BJT Page 072] [x 72/]

114. Atha kho bhikkhave, bhikkhū yebhuyyena ekāheneva janapadacārikaṃ pakkamiṃsu. Tena kho pana bhikkhave, samayena jambudīpe caturāsīti āvāsasahassāni honti. Ekamhi vasse nikkhante devatā saddamanussāvesuṃ: "nikkhantaṃ kho mārisā ekaṃ vassaṃ pañca'dāni vassāni sesāni. Pañcannaṃ vassānaṃ accayena bandhumatī rājadhāni upasaṅkamitabbā pātimokkhuddesāyā"ti. Dvīsu vassesu nikkhantesu devatā saddamasussāvesuṃ: "nikkhantāni kho mārisā dve vassāni, cattāridāni vassāni sesāni. Catunnaṃ vassānaṃ accayena bandhumatī rājadhāni upasaṅkamitabbā pātimokkhuddesāyā"ti. Tīsu vassesu nikkhantesu devatā saddamanussāvesuṃ: 'nikkhantāni kho mārisā tīṇi vassāni. Tīṇi'dāni vassāni [PTS Page 049] [q 49/] sesāni. Tiṇṇaṃ vassānaṃ accayena bandhumatī rājadhāni upasaṅkamitabbā pātimokkhuddesāyā"ti. Catusu vassesu nikkhantesu devatā saddamanussāvesuṃ: "nikkhantāni kho mārisā cattāri vassāni. Dve'dāni vassāni sesāni. Dvinnaṃ vassānaṃ accayena bandhumatī rājadhāni upasaṅkamitabbā pātimokkhuddesāyā"ti. Pañcasu vassesu nikkhantesu devatā saddamanussāvesuṃ: "nikkhantāni kho mārisā pañca vassāni. Ekaṃ'dāni vassaṃ sesaṃ. Ekassa vassassa accayena bandhumatī rājadhāni upasaṅkamitabbā pātimokkhuddesāyā"ti. Chasu vassesu nikkhantesu devatā saddamanussāvesuṃ: "nikkhantāni kho mārisā chabbassāni. Samayo'dāni bandhumatiṃ rājadhāniṃ upasaṅkamituṃ pātimokkhuddesāyā"ti.

115. Atha kho te bhikkhave bhikkhu, appekacce sakena iddhānubhāvena, appekacce devatānaṃ iddhānubhāvena, ekāheneva bandhumatiṃ rājadhāniṃ upasaṅkamiṃsu pātimokkhuddesāya. Tatra sudaṃ bhikkhave vipassī bhagavā arahaṃ sammāsambuddho bhikkhusaṅghe evaṃ pātimokkhaṃ uddisati:

"Khantī paramaṃ tapo titikkhā,
Nibbānaṃ paramaṃ vadanti buddhā.
Na hi pabbajito parūpaghātī
Samaṇo hoti paraṃ viheṭhayanto.

Sabbapāpassa akaraṇaṃ kusalassa upasampadā,
Sacittapariyodapanaṃ etaṃ buddhānasāsanaṃ.

Anūpavādo anūpaghāto pātimokkhe ca saṃvaro,
[PTS Page 050] [q 50/] mattaññutā ca bhattasmiṃ pantañca sayanāsanaṃ,
Adhicitte ca āyogo etaṃ buddhāna sāsanaṃ"ti.