Home
Previous
Text to find
Next
Pali Canon: sutta pitaka , Samyutta nikaya , book: 4 , database record: 5097 .
[BJT Page 700] [x 700/]

Tathāgato ca kho vaccha, arahaṃ sammāsambuddho na rūpaṃ attato samanupassati. Na rūpavantaṃ vā attānaṃ, na attani vā rūpaṃ, na rūpasmiṃ vā attānaṃ. Na vedanaṃ attato samanupassati. Na vedanāvantaṃ vā attānaṃ, na attani vā vedanaṃ, na vedanāsmiṃ vā attānaṃ. Na saññaṃ attato samanupassati, na saññāvantaṃ vā attānaṃ, na attani vā saññāṇaṃ, na saññāṇasmiṃ vā attānaṃ. Na saṅkhāre attato samanupassati. Na saṅkhārevantaṃ vā attānaṃ, na attani vā saṅkhāre, na saṅkhārasmiṃ vā attānaṃ. Na viññāṇaṃ attato samanupassati, na viññāṇavantaṃ vā attānaṃ, na attani vā viññāṇaṃ, ka viññāṇasmiṃ vā attānaṃ. Tasmā tathāgatassa evaṃ phuṭṭhassa na evaṃ vyākaraṇaṃ hoti:
"Sassato lokotipi, asassato lokotipi antavā lokotipi, anantavā lokotipi taṃ jīvaṃ taṃ sarīrantipi aññaṃ jīvaṃ aññaṃ sarīrantipi, na hoti tathāgato parammaraṇātipi, na hoti tathāgato parammaraṇātipi, hoti ca na ca hoti tathāgato parammaraṇātipi, neva hoti na na hoti tathāgato parammaraṇātipi, neva hoti na na hoti tathāgato parammaraṇātipi" ti.

Acchariyaṃ bho moggallāna, abbhutaṃ bho moggallāna, yatra hi nāma satthu ca sāvakassa ca atthenattho vyañjanena vyāñjanaṃ saṃsandissati samessati na vihāyissati yadidaṃ aggapadasmiṃ idānāhaṃ bho moggallāna, samaṇaṃ gotamaṃ upasaṅkamitvā etamatthaṃ āpucchiṃ. Samaṇopi me gotamo etehi padehi etehi vyañjanehi etamatthaṃ vayākāsi seyyathāpi bhavaṃ moggallāno. Acchariyaṃ bho moggallāna, abbhutaṃ bho moggallāna, yatra hi nāma satthu ca sāvakassa ca atthenattho vyāñjanena vyañjanaṃ saṃsandissati samessati na vibhāyissati yadidaṃ aggapadasminti.

10. 1. 9
Kutuhalasālāsuttaṃ

2284. [PTS Page 398] [q 398/] atha kho vacchagotto paribbājako yena bhagavā tenupasaṅkami. Upasaṅkamitvā bhagavatā saddhiṃ sammodi, sammodanīyaṃ kathaṃ sārāṇīyaṃ vītisāretvā ekamantaṃ nisīdi. Ekamantaṃ nisinno kho vacchagotto paribbājako bhagavantaṃ etadavoca: purimāni bho gotama divasāni purimatarāni sambahulānaṃ nānātitthiyaṃ-1. Samaṇabrāhmaṇaṃ paribbājakānaṃ kutuhalasālāyaṃ sannisinnānaṃ sannipatitānaṃ ayamantarā kathā udapādi.

Ayaṃ kho pūraṇo-2. Kassapo saṅghī ceva gaṇī ca gaṇācariyo ca ñāto yayassi titthakaro sādhusammato bahujanassa. Sopi sāvakaṃ abbhatītaṃ kālakataṃ uppattisu-3. Vyākaroti: asu amutra uppanno-4. Asu amutra uppannoti. Yo-5. Pissa sāvako uttamapuriso paramapuriso paramapattipatto, tampi sāvakaṃ abbhatītaṃ kālakataṃ uppattisu vyākaroti: asu amutra uppanno, asu amutra uppannoti.

1. Nānātitthiyānaṃ samaṇabrāhmaṇānaṃ paribbājikānaṃ - machasaṃ
Aññatitthiyānaṃ samaṇabrāhmaṇānaṃ paribbājakānaṃ - syā.
2. Purāṇo - sī 1, 2.
3. Uppattīsu - machasaṃ syā.
4. Uppanno - machasaṃ syā.
5. So - sī, 1, 2.