Home
Previous
Text to find
Next
Pali Canon: sutta pitaka , Samyutta nikaya , book: 1 , database record: 4224 .
[BJT Page 392] [x 392/]

No ce dhammaṃ anussareyyātha, atha saṅghaṃ anussareyyātha: " supaṭipanno bhagavato sāvakasaṅgho. Ujupaṭipanno bhagavato sāvakasaṅgho. Ñāyapaṭipanno bhagavato sāvakasaṅgho. Sāmīcipaṭipanno bhagavato sāvakasaṅgho. Yadidaṃ cattāri purisayugāni, aṭṭha purisapuggalā, esa bhagavato sāvakasaṅgho āhuneyyo pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassā'ti. Saṅghaṃ hi vo bhikkhave anussarataṃ yaṃ bhavissati bhayaṃ vā chambhitattaṃ vā lomahaṃso vā so pahīyissati.

Taṃ kissa hetu? Tathāgato hi bhikkhave arahaṃ sammāsambuddho vītarāgo vitadoso vītamoho abhīru acchamhī anutrāsī apalāyīti.

Idamavoca bhagavā. Idaṃ vatvā sugato athāparaṃ etadavoca satthā:

Araññe rukkhamūle vā suññāgāreva1 bhikkhavo,
Anussaretha sambuddhaṃ bhayaṃ tumahāka2 no siyā.

No ce buddhaṃ sareyyātha lokajeṭṭhaṃ narāsabhaṃ,
Atha dhammaṃ sareyyātha niyyānikaṃ sudesitaṃ.

No ce dhammaṃ sareyyātha niyyānikaṃ sudesitaṃ,
Atha saṅghaṃ sareyyātha puññakkhettaṃ anuttaraṃ.

Evaṃ buddhaṃ sarantānaṃ dhammaṃ saṅghañca bhikkhavo,
Bhayaṃ vā chambhitattaṃ vā lomahaṃso na hessatīti.

11. 1. 4

Vepacittisuttaṃ.

250. Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi bhikkhavoti. Bhadanteti te bhikkhū bhagavato paccassosuṃ. Bhagavā etadavoca:

[PTS Page 221] [q 221/] bhūtapubbaṃ bhikkhave devāsurasaṅgāmo samupabbūḷho ahosi. Atha kho bhikkhave vepacitti asurindo asure āmantesi: sace mārisā devāsurasaṅgāme3 samūpabbūḷhe asurā jineyyuṃ, devā parājeyyuṃ, 4 yena taṃ5 sakkaṃ devānamindaṃ kaṇṭhapañcamehi6 bandhanehi bandhitvā mama santike āneyyātha asurapuranti.

Sakko pi kho bhikkhave devānamindo deve tāvatiṃse āmantesi.

1. Vā-[pts 2.] Tumhākaṃ-[pts 3.] Devānaṃ asurasaṅgāme-machasaṃ. [Pts 4.] Parājineyyuṃ-machasaṃ syā 5. Naṃ-syā[pts.] Machasaṃ. 6. Kaṇaṭhepañcamehi-[pts.]