148. Yathā'pi osadhī nāma tulābhūtā sadevake
Samaye utuvasse1 vā nevokkamati 2 vīthito.

149. Tathe'va tvampi saccesu mā okkami hi 3 vīthito
Saccapāramitaṃ gantvā sambodhiṃ pāpuṇissasi.

150. Na hete ettakāyeva buddhadhammā bhavissare
Aññe'pi vicinissāmi ye dhammā bodhipācanā.
[PTS Page 015] [q 15/]
151. Vicinanto tadā dakkhiṃ aṭṭhamaṃ adhiṭṭhānapāramiṃ
Pubbakehi mahesīhi āsevitanisevitaṃ.

152. Imaṃ tvaṃ aṭṭhamaṃ tāva daḷhaṃ katvā samādiya
Tattha tvaṃ acalo hutvā sambodhiṃ pāpuṇissasi.

153. Yathā'pi pabbato selo acalo suppatiṭṭhito
Na kampati bhusavātehi sakaṭṭhāne'va tiṭṭhati.

154. Tathe'ca tvampi adhiṭṭhāne sabbadā acalo bhava
Adhiṭṭhānapāramiṃ4 gantvā sambodhiṃ pāpuṇissasi.

155. Na hete ettakāyeva buddhadhammā bhavissare
Aññe'pi vicinissāmi ye dhammā bodhipācanā.

156. Vicinanto tadā dakkhiṃ navamaṃ mettāpāramiṃ pubbakehi mahesīhi āsevitanisevitaṃ.

157. Imaṃ tvaṃ navamaṃ daḷhaṃ katvā samādiya
Mettāya asamo hohi yadi bodhiṃ pattumicchasi.

158. Yathā'pi udakaṃ nāma kalyāṇe pāpake jane
Samaṃ pharati sītena pavāheti rajomalaṃ. 5

1. Utuvaṭṭe-pu. 2. Na vokkamati-sīmu, machasaṃ, syā, na okkamati-asā.
3. Nātikkama hi-sīmu, mā vokkama hi-machasaṃ, mā vokkami hi-maci. Mā vokkamasi-syā
4. Adhiṭṭhāna pāramitaṃ-sīmu, machasaṃ. 5. Rajaṃ malaṃ-pu.