Home
Previous
Text to find
Next
Pali Canon: Paracanonical , Milandapanho , book: 1 , database record: 14846 .
[SL Page 044] [x 44/]

Kāmaguṇehi samappito samaṅgibhuto paricareyya. So ce janassa āroceyya'na me rājā kiñci paṭikarotī'ti, kinnu kho so mahārāja puriso yuttakārī bhaveyyā?"Ti.

"Na hi bhante" ti.

"Evameva kho mahārāja kinte etena pucchitena. Nanu mayā paṭigacceva akkhātaṃ 'sace sa upādāno bhavissāmi, paṭisandahissāmi. Sace anupādāno bhavissāmi na paṭisandahissāmī" ti.

"Kallo'si bhante nāgasenā" ti.

8. Rājā āha: "bhante nāgasena yampanetaṃ brūsi nāmarūpanti, tattha katamaṃ nāmaṃ katamaṃ rūpanti?"
"Yaṃ tattha mahārāja oḷārikaṃ, etaṃ rūpaṃ. Ye tattha sukhumā cittacetasikā dhammā etaṃ nāmanti".

"Bhante nāgasena kena kāraṇena nāmaṃyeva na paṭisandahati? Rūpaṃ yeva vā?" Ti.

"Aññamaññāpanissitā mahārāja ete dhammā ekato'va uppajjantī" ti.
"Opammaṃ karohī" ti.

"Yathā mahārāja kukkuṭiyā kalalaṃ na bhaveyya, aṇḍampi na bhaveyya. Yañca tattha kalalaṃ, yañca aṇḍaṃ, ubhopete aññamaññanissitā. Ekato'va tesaṃ uppatti hoti. Evameva kho mahārāja yadi tattha nāmaṃ na bhaveyya, rūpampi na bhaveyya. Yañceva tatthanāmaṃ yañceva rūpaṃ, ubhepete aññamaññanissitā ekato'va tesaṃ uppatti hoti evametaṃ dīghamaddhānaṃ sambhāvitanti. "

"Kallo'si bhante nāgasenā" ti.

9. Rājā āha: "bhante nāgasena yampanetaṃ brūsi 'dīghamaddhāna'nti, kimetaṃ addhānaṃ nāmā?" Ti.

"Atīto mahārāja addhā, anāgato addhā, paccuppanno addhā" ti.

"Kimpana bhante addhā atthi" ti.

"Koci'pi mahārāja addhā atthi, koci'pi natthi" ti.

"Katamo pana bhante atthi? [PTS Page 050] [q 50/] katamo natthi?" Ti.